Мин тыыннаах киһибин
Дьоннор, миигин таптааҥ!
Өлө иликпинэ, алҕаан,
Өллөхпүнэ өрүкүтүмэҥ!

Сир үрдэ тымныы,
Сылаас тыыҥҥытынан
Абырааҥ тыыннаахпына!
Мин тыыннаах киһибин.

Өлбүттэри - аһыйабын,
Өлө иликтэри - аһынабын.
Аһынабын, тарбаҕым
Титирии тымныйарынан,
Күөмэйим куура хатарынан.

Мин тыыннаах киһибин,
Халлаан дириҥ
Сир урдэ киэҥ
Мунарым өйдөнөр.

Ол эрэн син биир
Хайа да халлаан
Хаһытыыр хараҥатыгар
Дьону аһынар
Дьолу баҕарар
Сырдык сулустаахпын.

Мин тыыннаах киһибин
Мин эһигини аһынабын- 
Абаран хараҕым тымныйыа,
Сирэйим кубарыйыа
Уордайыахпар диэритин.

Мин тыыннаахпын
Аһынар санаа аргыстаахпын
Ол иһин олус дьоллоохпун.

Дьоннор балаамаҥ
Ааттал тылы билбэппин
Ону да сатаабаппын.

Эн иһит,
Ханнык да айыылаах
Айманар дууһалаах,
Кэтэс миигин
Кэлтэй эрэйинэн.

Кэлиэм эйиэхэ
Киһи дууһатын
Күүрдэр мичээрин
Көстубэт сылааһын
Көтөҕөн.

Сүрэхпин уунуом эйиэхэ,
Саарбахтыы, турбакка
Мин тыыннаах киһибин
Дьоннор, миигин таптааҥ!

 Варвара Потапова