Мин дьоллоох этим

Былыыр-былыр, мин төрүөм быдан иннинэ,

Буор да кутум айылла илигинэ,

Мин сиик дуу, сибэкки дуу эрдэхпинэ –

Син биир илбиһирэрим эйигинэн.

     Сиик таммаҕа буолан, күҥҥэ чаҕылыйан,

     Эн күн дууһаҕын үөрэ үтүктэрим,

     Сибэкки буолан, кырааска нарынынан

     Эн айыы ньууруҥ силигин ситэрэрим.

Сыллар ааһаллара. Мин киһи буолуубар,

Мин ийэ куппар, буор куппар барытыгар

Эн баар этиҥ. Эн бааргын экчи билэрим:

Түүн түһээн көрөрүм, күнүс ирдиирим.

     Саллар сааспар эйигин көһүттүмм,

     Саллар сааспар эйигин эрэ көрдөөтүм:

     Мин сииккэ сиэллим, мин халтай хаарга хаамтым –

     Орто туруу дойдубуттан эйиигин булбатым.

Ол эрээри… Ол эрээри, мин дьоллоох этим

Эн сирдээҕи образкын айбыппыттан,

Кэмсиниэм эрэ буолуо күнүм киириитэ

Эйиигин көрбөтөх аанай абаккабыттан.

Сэмэн Данилов